Tóney - tónskóli og pilates, miðstöð fyrir tónlist og hreyfingu

Á Tóney er unnið að tónlist á breiðum grunni, í formi námskeiða, fyrirlestra, hóp- og einkakennslu. Áhersla er lögð á hljóðfæraleik, söng og almenna tónlistarþjálfun, auk tækni- og fræðipælinga, tónsmiðju og margvíslegra verkefna tengdum tónlist. Starfið veturinn 2009-10 verður mótað í tveimur önnum; haust og vor en einnig lögð sérstök áhersla á styttri námskeið og fyrirlestra. Klassík-, jazz-, heims- og tilraunatónlist eiga samastað á Tóney en gert er ráð fyrir þátttakendum á öllum aldri.

Á Tóney eru þróuð námskeið sem fara fram í leikskólum, grunnskólum og framhaldsskólum í samstarfi við umsjónakennara á hverjum stað. Þetta eru námskeið sem koma inn í tónmenntakennslu hvers skóla, sjálfstæðar einingar tvinnaðar í hefðbundið nám og unnar af fagfólki. Tóney mun í vetur koma að tónmenntakennslu í nokkrum grunnskólum Reykjavíkur, þ.m Sæmundarskóla, Fellaskóla og Langholtsskóla, þar sem við sjáum um tónmenntir og tónlistarþjálfun en einnig Hvassaleitisskóla og Álftamýrarskóla þar sem Tóney kemur að hljóðfærakennslu og tónleikahaldi innan skólanna.
Tóney hefur haldið leikskólanámskeið t.d. á Vesturborg, á liðnu vori, því lauk með skemmtilegum tónleikum og útgáfu geisladisks, leiðbeinandi var Margrét Sigurðardóttir söngkona.
Einnig stóð Tóney að eins dags tónsmiðju í Menntaskólanum við Sund í febrúar 2009, þátttakendur voru nokkur hundruð nemendur skólans en meðal leiðbeinenda voru Áki Ásgeirsson, Áskell Másson og Ragnhildur Gísladóttir tónskáld.

Farkennsla er verkefni þar sem fagfólk frá Tóney heimsækir skóla á landsbyggðinni og aðstoðar við kennslu og uppbyggingu námsefnis.